मकवानपुरको हेटौंडामा बोलेरो गाडीले मोटरसाइकललाई ठक्कर दिँदा एक जनाको मृत्यु भएको छ । गएराति पूर्वपश्चिम राजमार्ग अन्तर्गत पर्ने हेटौंडा उपमहानगरपालिका वडा नम्वर–९ हनुमान गेट नजिकै बोलेरो गाडीको ठक्करबाट एक जना पुरुषको मृत्यु भएको जिल्ला प्रहरी कार्यालय मकवानपुरले जनाएको छ ।
पथलैयाबाट हेटौंडातर्फ आइरहेको ना ३ च ११९३ नम्वरको भैंसी बोकेको बोलेरो गाडीले आज राति १२ः४५ बजेको समयमा विपरित दिसातर्फ जाँदै गरेको ना ३४ प ६०४४ नम्वरको मोटरसाइकललाई ठक्कर दिँदा दुर्घटना भएको जिल्ला प्रहरी कार्यालय मकवानपुरका प्रहरी नायव उपरिक्षक जयश्वर रिमालले जानकारी दिए ।
उनका अनुसार बोलेरोको ठक्करबाट मृत्यु हुनेमा मोटरसाइकल चालक कैलाश गाउँपालिका वडा नम्वर–४ कालिकाटार निवासी २४ बर्षीय अबिरल रिजाल रहेका छन् ।
बोलेरोको ठक्करबाट घाइते भएका रिजालको हेटौंडा अस्पतालमा उपचारको क्रममा मृत्यु भएको हो । उनलाई उपचारको लागि मदन भण्डारी स्वास्थ्य विज्ञान प्रतिष्ठान हेटौंडा अस्पताल ल्याइएको भएपनि ल्याउनासाथ चिकित्सकले मृत घोषणा गरेको प्रहरी नायव उपरिक्षक रिमालले बताए । ठक्कर दिने बोलेरो र चालक प्रहरी नियन्त्रणमा रहेको उनले बताए ।
मृतक रिजालको शव पोस्टमार्टमको लागि अस्पतालको शव गृहमा राखिएको र घटनाबारे थप अनुसन्धान भइरहेको प्रहरीले जनाएको छ ।
आफ्नो प्रतिक्रिया दिनुहोस् !