भक्तपुर, ८ फागुन । रमेश गिरी । प्रमुख प्रतिपक्ष दल नेकपा (एमाले)का अध्यक्ष एवं पूर्वप्रधानमन्त्री केपी शर्मा ओलीले आउँदो बैशाख ३० गते हुने स्थानीय तहको निर्वाचन निष्पक्ष रुपमा सञ्चालन गर्न कर्मचारी र सुरक्षाकर्मीलाई आग्रह गर्नु भएको छ ।
सूर्यविनायक नगरपालिकाले भक्तपुरको जगातीमा सञ्चालनमा ल्याएको सूर्यविनायक नगर अस्पतालको शनिवार उद्घाटन गर्दै उहाँले निर्वाचन निष्पक्ष गर्न कर्मचारी र प्रशासनले सघाउनु पर्ने बताउनु भएको हो । एमाले कार्यकर्तालाई निर्वाचनको तयारमिा लाग्न उहाँले आव्हान गर्नु भयो । सत्ता गठबन्धनले एमसीसीलाई ठगि खाने भाँडो बनाएको आरोप लगाउँदै ओलीले सरकारले एमसीसीबारे निर्णय गर्न नसक्दा अन्तर्राष्ट्रिय सम्बन्ध नै बिग्रिएको बताउनु भयो ।
एमाले नेतृत्वको सरकारमा एमसीसी संसदमा पेश गर्न खोज्दा नदिएको भन्दै ओलीले भन्नुभयो, “हामीले सरकारमा रहँदा संसदमा एमसीसी पेश गरौं भनेका थियौं, संसदलेनै निर्णय गर्छ, संसदमा हामीले छानेर पठाएका जनप्रनिधिहरुले नै निर्णय गर्छन्, निर्णय गर्ने ठाउँमा त पु¥याइदिऔं भन्दा उनीहरुले संसदमा पु¥याउन दिएनन्, अहिले पनि निर्णय गर्ने ठाउँमा पु¥याउन सकेका छैनन्, बाहिर बुरुक्क–बुरुक्क उफ्रिन्छन्, संसदमा नपु¥याउने बाहिर बुरुक्क बुरुक्क उफ्रिने ?”
एमाले अध्यक्ष ओलीले अब सर्वोच्च अदालत नभइ चुनावी जनअदालतको निर्णयमा नेकपा एमाले अगाडि बढ्ने बताउनु भयो । उहाँले भन्नुभयो, “उबेला माओवादीले दुईचार जना राखेर जनअदालत चलाउथ्यो, अब हामी तीन करोड जनता राखेर जनअदालत चलाउँछौ, हाम्रो जनअदालतमा फैसला जनताले गर्छन्, जनताभन्दा माथि कोही छैनन्, जनताको आदेश मान्न हामी तयार छौँ ।”
एमाले अध्यक्ष ओलीले एमालेका नेता कार्यकर्तालाई झुक्याएर लाने गरेको बताउदै पार्टी छाडेर गएकाहरुलाई एमालेमै फर्कन समेत आह्वान गर्दै भन्नुभयो, “उहिले पूर्वतिर मेला लाग्थ्यो, एकथरी उरन्ठेउलाहरु हुल बाँधेर खल्तीमा सिन्दूर हालेर जुम्सो जस्तो भएर जान्थे, अनि राम्री केटी देख्यो कि छ्वास्स टाउँकोमा सिन्दुर फ्याकेर गुटुटु भाग्ने । माईतीहरु सिन्दुर हालिहाल्यो भनेर सिन्दुर लाउने उरेन्ठेउलालाई खोजेर जिम्म लगाउँथे, प्रचण्ड र माधव नेपालहरुले पनि अहिले त्यसै गरेका छन्, कहिले माकुनले झुक्याएर सिन्दुर हालिदिएको छ ।
कहिले प्रचण्डले झुक्याएर छ्वास्स हालिदिएको छ । कहिले काँग्रेसले सिन्दुर हालिदिएको छ । आजको जवानामा पनि त्यस्तो कुरामा भर परेर हुन्छ ? हामी माइतीहरु सिन्दुर कसले हाल्यो भनेर खोजेर चेलीलाई जिम्मा लगाउने होइन । तिनीहरुले झुक्याएर हालिदिएका सिन्दुरहरु छोडिदिनुस् । एमालेमा आउनुस् लक साबुनले नुहाउनुस्, देश बनाउने अभियानमा लागौं ।”
प्रचण्ड र नेपालले झुक्याएर पार्टीको सदस्यता दिएकाहरुलाई पार्टीमा आउन र राष्ट्र निर्माणको अभियानमा सहभागी हुन आग्रह गर्दै ओलीले सरकारको आयु बढीमा एक वर्ष मात्रै रहेको बताउनु भयो । ओलीले भन्नुभयो, “जतिनै चुनाब पछाडि सार्न खोजे पनि अबका एक वर्षभित्र हुने संघीय संसदको चुनावपछि एमालेले फेरी सरकार चलाउँछ, चुनावमा कहाँ बच्ला र यो स्वार्थी गठबन्धन ? बच्न सक्दैन । त्यसकारण अब त बढीमा एक वर्ष हो यिनको आयु । संसारभरका ज्योतिषीलाई एकैठाउँमा राखेर सोध्यो भने पनि त्यही भन्छ, बढीमा एक वर्ष हो, यो सरकारको आयु ।”
उहाँले सरकारले काम गर्न नसकेको आरोप लगाउँदै सरकारले काम गर्न नसक्दा देश चरम आर्थिक संकटमा परेको बताउनु भयो । ओलीले अहिलेको सत्तागठबन्धनमा आबद्ध पाँच दललाई ‘गिद्ध’को संज्ञा दिदै ओलीले भन्नुभयो, “धुरीमा एउटै गिद्ध बस्यो भने अशुभ मानिन्छ, यहाँ त पाँच–पाँचवटा गिद्ध बसेको छ, देशको हालत त्यसै यस्तो भएको होइन, अब देशलाई सुधार्नु पर्छ ।”
कार्यक्रममा एमाले पोलिटव्यूरो सदस्य, प्रतिनिधि सभा सांसद एवं पूर्वमन्त्री महेश बस्नेतले भक्तपुरमा बिकासले फड्को मारेको बताउँदै दैनिक शिलन्यास र उद्घाटन जारी रहेको बताउनुभयो । नेता बस्नेतले मुलुकको राजनीति केपी ओली वरिपरि घुमिरहेको उल्लेख गर्नुभयो । नेता बस्नेतले हिजो वालुवाटारबाट बालकोटको बार्दलीमा पुर्यायौं भन्दै आलोचना गर्नेहरु अहिले मुलुकको संकट समाधानको लागि बालकोट नै धाउन थालेको बताउनुभयो ।
अध्यक्ष ओलीलाई परमादेशबाट हटाई पाँच दलीय गठबन्धनले बालकोटको बारदलीमा पुर्याएको भन्दै आलोचना गरेका थिए । सोही कुरालाई लक्षित गर्दै नेता बस्नेतले केपी ओली नेपाली राजनीति र मुलुकको मियो भएको उहाँको दावी थियो । शेरबहादुर देउवा, पुष्पमकल दाहाल प्रचण्ड तथा माधव कुमार नेपाललाई लक्षित गर्दै नेता बस्नेतले तीन मुखे वर्माहरुले गर्दा मुलुकको विकास नहुने दावी गर्नुभयो । वर्तमान सरकारको काम केपी ओली नेतृत्वको सरकारले जारी गरेको नेपालको नया चुच्चे नक्सालाई बुच्चे बनाएको उहाँले बताउनुभयो ।
वर्तमान सरकारको गतिविधिले नेपाली जनता भोकमरीको अवस्थामा पुग्ने संकेत देखा परेको उल्लेख गर्दै उहाँले पछिल्लो समय केपी ओली नेतृत्वको सरकार जनताले खोजिरहेको बताउनुभयो । माओवादी केन्द्रका अध्यक्ष पुष्पकमल दाहाल प्रचण्डलाई चारमुखे भएको आरोप लगाउँदै उहाँले एमसीसीका मामलामा प्रचण्डले गरेको अपरिपक्व कदमका कारण समस्या भएको बताउनुभयो ।
त्यसअवसरमा वाग्मति प्रदेशसभा सदस्य शशीजंग थापा, जिल्ला समन्वय समिति भक्तपुरका सभापति नवराज गेलाल, एमाले केन्द्रीय सदस्य एवं चाँगुनारायण नगरपालिकाका प्रमुख सोमप्रसाद मिश्र,मध्यपुरथिमि नगरपालिकाका प्रमुख मदनसुन्दर श्रेष्ठ, सूर्यविनायक नगरपालिकाका प्रमुख वासुदेव थापा, सूर्यविनायक नगरपालिकाका उपप्रमुख जूना बस्नेत, अस्पताल निर्माण समितिका संयोजक एवं वडा नं. ८ का वडाध्यक्ष किरण थापा, वडा नं. ७ का वडाध्यक्ष रबिन्द्र सापकोटा, नगरपालिकाका प्रवक्ता उपेन्द्र केसीलगायतले भक्तपुरमा विगत पाँच वर्षमा भएका विकासका आयोजनाहरुकोबारेमा चर्चा गर्नु भयो ।
आफ्नो प्रतिक्रिया दिनुहोस् !