पर्वत । पर्वतबाट प्रतिनिधि सभा सदस्यमा नेकपा (एमाले) का उम्मेदवार पदम गिरी निर्वाचित हुनुभएको छ ।
भर्खरै सम्पन्न अन्तिम मत परिणाम अनुसार गिरीले २ हजार २ सय ६३ मतको अन्तरले विजयी हुनुभएको हो । उहाँले २९ हजार ८ सय ७२ मत प्राप्त गर्नुभएको छ भने उहाँका निकटतम प्रतिस्पर्धी नेपाली कांग्रेसका अर्जुनप्रसाद जोशीले २७ हजार ६ सय ९ मत पाउनुभएको छ ।
पदम गिरी दोस्रो कार्यकालका लागि निर्वाचित हुनुभएको छ । यस अघि २०७४ सालको निर्वाचनमा पनि जोशीसँगै १२ हजार ५ सय मतको अन्तरमा विजयी हुनुभएको थियो ।
एक प्रतिनिधि सभा र दुई प्रदेश सभा सदस्यको सिट रहेको पर्वतमा दुवै प्रदेश सभामा एमालेका उम्मेदवार विजयी भएका छन् । प्रदेश सभा १ मा एमालेका भक्त कुँवर माओवादी केन्द्रका सुदिप कुँवरलाई पराजित गर्दै विजयी हुनुभएको छ ।
त्यस्तै प्रदेश सभा २ मा नेपाली कांग्रेसका ऋषिकेश तिवारीलाई पराजित गर्दै एमालेका मित्रलाल बस्याल विजयी हुनुभएको छ । पर्वतमा ६६ हजार २ सय २३ मत खसेको थियो ।
आफ्नो प्रतिक्रिया दिनुहोस् !